காசா பகுதியில் சனிக்கிழமை முதல் இஸ்ரேல் நடத்தும் விதிமுறைகளை மீறிய தாக்குதலில் மொத்தம் 1,055 பேர் கொல்லப்பட்டுள்ளனர். 5,184 பேர் காயமடைந்துள்ளனர் என்று அங்குள்ள சுகாதார அமைச்சகம் புதன்கிழமை தெரிவித்துள்ளது.
இஸ்ரேலிய இராணுவம் மேற்குக் கரையில் குறைந்தது ஐந்து பாலஸ்தீனியர்களைக் கொன்றது. அப்பகுதியில் பொதுமக்களுடனான மோதலின் போது பலரைக் கைது செய்துள்ளது.
மேற்குக் கரையில் பாலஸ்தீனிய குடிமக்களுக்கும், சட்டவிரோத இஸ்ரேலிய குடியேறியவர்களுக்கும் இஸ்ரேலியப் படைகளுக்கும் இடையே நடந்து வரும் வன்முறைகளுக்கு இடையே பதட்டங்கள் அதிகரித்து வருகின்றன.
காசாவில் உள்ள ரிமால் சுற்றுப்புறம் – பல்கலைக்கழகங்கள், ஊடக நிறுவனங்கள் மற்றும் உதவி நிறுவனங்களின் அலுவலகங்கள் – இஸ்ரேல் தொடர்ந்து அப்பகுதி மற்றும் நகரின் பல பகுதிகளை குண்டுவீசித் தாக்கியதால் சுடுகாடாக மாறியுள்ளது.
ஐ.நா நடத்தும் பாடசாலைகளில் காசா மக்கள் குவிந்து வருவதால், பாதுகாப்பான சுற்றுப்புறங்களின் எண்ணிக்கை இல்லாமலாகி விட்டதால்- மனிதாபிமான குழுக்கள் காசாவுக்குள் உதவிகள் சென்றடைய தாழ்வாரங்களை உருவாக்குமாறு கோரி வருகின்றன.
காயமடைந்தவர்களால் நிரம்பி வழியும் மருத்துவமனைகளில் மருந்துகள் முடிந்து விட்டன.
காஸாவிலிருந்து குறைந்தது 500 பேர் மேற்குக் கரை நகரமான ரமல்லாவுக்குச் சென்றனர், அங்கு வசிப்பவர்கள் இஸ்ரேலிய வன்முறையிலிருந்து வெளியேறும் நூற்றுக்கணக்கான மக்களுக்கு தங்கள் வீடுகளை வழங்கினர்.
காஸா மீதான தாக்குதல்கள் தொடரும் பட்சத்தில், இஸ்ரேலின் குண்டுவீச்சில் இருந்து காசாவாசிகள் தப்ப முடியாது என ஐ.நா தெரிவித்துள்ளது.
காசாவில் உணவு, எரிபொருள் மற்றும் மருந்து விநியோகத்தை இஸ்ரேல் நிறுத்தியுள்ளது, மேலும் எகிப்தில் இருந்து எஞ்சியிருந்த ஒரே அணுகல் பாதையையும் செவ்வாய்கிழமை மூடப்பட்டது. மின்சாரம் துண்டிக்கப்பட்டுள்ளது.
காசா மீதான ஹமாஸின் பிடியை நசுக்குவது என்பதில் இஸ்ரேல் உறுதியாகத் இருப்பதாக தெரிகிறது. கடந்த சனிக்கிழமை ஹமாஸ் போராளிகள் நடத்திய திகைப்பூட்டும் தாக்குதலில் குறைந்தது 1,200 இஸ்ரேலியர்கள் கொல்லப்பட்டனர்.
காசாவில் உள்ள ஹமாஸ் மற்றும் பிற போராளிக் குழுக்கள் சுமார் 150 பணயக்கைதிகளை பிடித்து வைத்திருப்பதாக இஸ்ரேல் கூறியுள்ளது.
இஸ்ரேல், எகிப்து மற்றும் மத்தியதரைக் கடல் ஆகியவற்றுக்கு இடையே 2.3 மில்லியன் மக்கள் வசிக்கும் 40 கிலோமீட்டர் நீளமுள்ள (25 மைல்) நிலப்பகுதியான காசா மீது இஸ்ரேல் தரைவழித் தாக்குதலை நடத்துமா என்பது கேள்விக்குறியாக உள்ளது.
செவ்வாயன்று இஸ்ரேல் தனது தாக்குதலை முடுக்கிவிட்டு, இராணுவத்துக்கு அணிதிரட்டப்படுபவர்களின் எண்ணிக்கையை 360,000 ஆக விரிவுபடுத்தியது. அதன் தெற்கு மற்றும் காசா எல்லையில் ஹமாஸ் தாக்குதல் நடத்திய பகுதிகள் மீது மீண்டும் கட்டுப்பாட்டை மீட்டுள்ளதாக இஸ்ரேல் ராணுவம் தெரிவித்துள்ளது.
செவ்வாயன்று லெபனான் மற்றும் சிரியாவில் உள்ள போராளிகளுடன் இஸ்ரேலின் வடக்கு எல்லைகள் மீதான புதிய துப்பாக்கிச் சண்டைகள் விரிவாக்கப்பட்ட பிராந்திய மோதலின் அபாயத்தை சுட்டிக்காட்டின.
சர்ச்சைக்குரிய எல்லைகளிலுள்ள பொதுமக்களை அங்கிருந்து வெளியேறுமாறு இஸ்ரேலிய இராணுவம் கேட்டுள்ளது.
கடந்த 24 மணி நேரத்தில் 450 இலக்குகளை தாக்கியதாக இஸ்ரேலிய இராணுவம் தெரிவித்துள்ளது.
காசாவிலுள்ள சுயாதீன தகவல்களின்படி இஸ்ரேலிய இராணுவத்தின் பெரும்பாலான தாக்கதல் இலக்குகள் பொதுமக்கள் வாழிடங்களே. ஹமாஸால் கொல்லப்பட்ட இஸ்ரேல் பொதுமக்களை விட, காசாவில் அதிகமானவர்களை கொல்லும் நோக்கத்துடன் தாக்குதல்கள் நடத்தப்படுகின்றன.
“காஸாவில் இப்போது பாதுகாப்பான இடம் இல்லை. கண்ணியமான மனிதர்கள் ஒவ்வொரு நாளும் கொல்லப்படுவதை நீங்கள் காண்கிறீர்கள், ”என்று காசா பத்திரிகையாளர் ஹசன் ஜபார் மூன்று பாலஸ்தீனிய பத்திரிகையாளர்கள் குண்டுவெடிப்பில் கொல்லப்பட்ட பின்னர் கூறினார். “என் உயிருக்கு நான் உண்மையிலேயே பயப்படுகிறேன்.”
காஸாவில் உள்ள மீட்பு அதிகாரிகள் கூறுகையில், “பெரிய எண்ணிக்கையிலான” மக்கள் இன்னும் தரைமட்டமான கட்டிடங்களின் எச்சங்களின் கீழ் சிக்கியுள்ளனர், மீட்பு உபகரணங்கள் மற்றும் ஆம்புலன்ஸ்கள் அந்த பகுதிக்கு செல்ல முடியவில்லை.
பாலஸ்தீனிய குடிமைத் தற்காப்புப் படைகள், அடுக்குமாடி கட்டிடமொன்று தரைமட்டமாக்கிய பின்னர் இடிபாடுகளிற்குள்ளிருந்து 30 பேரை மீட்டெடுத்தனர்.
இடிபாடுகளிற்குள்ளிருந்து மீட்கப்பட்ட 46 வயதான ஒருவர் “நான் பொம்மைகளை விற்கிறேன், ஏவுகணைகளை அல்ல,” என்று அழுதார். “நான் காசாவை விட்டு வெளியேற விரும்புகிறேன். நான் ஏன் இங்கு தங்க வேண்டும்? நான் என் வீட்டையும் வேலையையும் இழந்தேன்“ என கண்ணீர் விட்டார்.
