கடந்த வாரம் கிரிமியாவில் உள்ள ரஷ்ய கருங்கடல் கடற்படையின் தலைமையகத்தில் முன்னோடியில்லாத வகையில் உக்ரைன் நடத்திய தாக்குதலுக்கு, வாஷிங்டனும் லண்டனும் உதவியதாக ரஷ்யா புதன்கிழமை கூறியது.
“மேற்கத்திய உளவுத்துறை சொத்துக்கள், நேட்டோ செயற்கைக்கோள் கருவிகள் மற்றும் உளவு விமானங்கள் ஆகியவற்றைப் பயன்படுத்தி தாக்குதல் முன்கூட்டியே திட்டமிடப்பட்டது என்பதில் சிறிதும் சந்தேகம் இல்லை” என்று ரஷ்ய வெளியுறவு அமைச்சக செய்தித் தொடர்பாளர் மரியா ஜாகரோவா கூறினார்.
ஏவுகணைத் தாக்குதல் “அமெரிக்க மற்றும் பிரிட்டிஷ் புலனாய்வு சேவைகளுடன் நெருக்கமான ஒருங்கிணைப்பில்” நடத்தப்பட்டது என்று அவர் மேலும் கூறினார்.
இணைக்கப்பட்ட கிரிமியாவில் உள்ள ரஷ்யாவின் கருங்கடல் கடற்படையின் தலைமையகத்தை வெள்ளிக்கிழமை தாக்கிய ஏவுகணைத் தாக்குதலுக்கு உக்ரைன் பொறுப்பேற்றது.
இந்த தாக்குதலில் ஒரு ரஷ்ய படைவீரரை காணவில்லை என்று ரஷ்யா கூறியது. அதே நேரத்தில் கடற்படை தளபதி விக்டர் சோகோலோவ் உட்பட 34 அதிகாரிகள் கொல்லப்பட்டதாக உக்ரைன் கூறியது.
ஆனால் உக்ரைன் கொல்லப்பட்டதாக கூறிய கடற்படை தளபதி உயிருடனுள்ள காட்சிகளை ரஷ்யா வெளியிட்டது
பெப்ரவரி 2022 இல் உக்ரைன்- ரஷ்யா யுத்தம் வெடித்ததை தொடர்ந்து, மேற்கத்திய சக்திகள் மாஸ்கோவிற்கு எதிராக நிதி மற்றும் இராணுவ ஆதரவை உக்ரைனுக்கு வழங்கி வருகின்றன.
