இரத்மலானை புகையிரத நிலையத்திற்கு எதிரே உள்ள கோழி இறைச்சி விற்பனை நிலையத்தின் உரிமையாளரை சுட்டுக்கொன்ற சம்பவத்தின் பிரதான சூத்திரதாரி, டுபாயில் தங்கியிருக்கும் பாதாள உலக கும்பலும் போதைப்பொருள் விற்பனையாளருமான அல்டோ தர்மா என விசாரணைகளில் தெரியவந்துள்ளது.
திங்கட்கிழமை (21) இரவு மோட்டார் சைக்கிளில் வந்த இருவரால் 9 மி.மீ ரக துப்பாக்கியால் துப்பாக்கிச் சூடு நடத்தப்பட்டுள்ளது. உயிரிழந்தவர் இரத்மலானை வீரசேன சில்வா மாவத்தையைச் சேர்ந்த எஸ்.ஏ.தேசப்பிரிய(40) என அடையாளம் காணப்பட்டுள்ளார்.
துப்பாக்கிச் சூடு நடத்தியவர்கள் இந்த வர்த்தகரைக் கொன்றுவிட்டு அங்குருவாதோட்டைக்கு தப்பிச் சென்றுள்ளதாக விசாரணையில் தெரியவந்துள்ளது.
இந்த துப்பாக்கிச் சூட்டுக்கு முந்தைய நாள், இந்த தொழிலதிபர் அல்டோ தர்மாவின் போதைப்பொருள் வலையமைப்புடன் தொடர்புடைய நபர் மீது குற்றம் சாட்டியதே இதற்குக் காரணம் என்று மூத்த அதிகாரி ஒருவர் கூறினார்.
பாதிக்கப்பட்டவர் குற்றச்செயல்களில் ஈடுபட்டதாக இதுவரை எந்தத் தகவலும் வெளியாகவில்லை என்று காவல்துறைப் பேச்சாளர் எஸ்எஸ்பி நிஹால் தல்துவ தெரிவித்தார்.
இரத்மலானை புகையிரத நிலையத்திற்கு அருகில் உள்ள இறைச்சிக் கடையின் உரிமையாளர் மீது துப்பாக்கிச்சூடு நடத்த வந்த துப்பாக்கிதாரிகள் பயன்படுத்திய மோட்டார் சைக்கிள் அங்குருவத்தோட்ட கெசல்ஹேனாவ பகுதியில் கைவிடப்பட்ட நிலையில் காணப்பட்டதாக பொலிஸார் தெரிவித்தனர்.
மோட்டார் சைக்கிளின் சேஸ் எண் மற்றும் என்ஜின் எண் ஆகியவை அழிக்கப்பட்டு, முன் பதிவு எண் பலகை மட்டும் இருந்ததாக போலீசார் தெரிவித்தனர்.
குறித்த இலக்கமானது குருநாகல் பிரதேசத்தில் வசிப்பவருடையது எனவும் இது போலியானதாக சந்தேகிக்கப்படுவதாகவும் பொலிஸார் தெரிவித்தனர்.
மோட்டார் சைக்கிள் பொலிஸாரால் கைப்பற்றப்பட்டுள்ளதுடன் மேலதிக விசாரணைகளை மேற்கொண்டு வருகின்றனர்.
