யாழ்ப்பாணம், வடமராட்சியை சேர்ந்த இளம் தமிழ் குடும்பப் பெண்ணொருவர் கனடாவில் சுட்டுக்கொல்லப்பட்ட சம்பவத்தில், அவரே கணவரே சூத்திரதாரியென்பதை நீதிமன்றம் உறுதி செய்தது. அவருக்கு முதல் நிலை கொலைக் குற்றச்சாட்டு தண்டனை வழங்கியது.
11 வார விசாரணைக்குப் பிறகு, விஜேந்திரன் பாலசுப்ரமணியம் தனது மனைவி தீபா சீவரத்தினம் (38) என்பவரை சுட்டுக்கொன்ற சம்பவத்தில் வாடகை கொலையாளிகளை பயன்படுத்தியது உறுதியானது.
மார்ச் 13, 2020 அன்று ஷெப்பர்ட் அவென்யூ ஈஸ்ட் மற்றும் பிரிம்லி சாலைக்கு அருகிலுள்ள குடியிருப்புப் பகுதியில் இந்த கொலை நடந்தது. இந்த கொலை சதித்திட்டத்தின் சூத்திரதாரி கணவர் விஜேந்திரன் பாலசுப்ரமணியம் என்று டொராண்டோ ஜூரி கண்டறிந்தது.
விஜேந்திரன் தனது மனைவியைக் கொல்ல வாடகைக்கு அமர்த்திய ஸ்டெட்லி கெர், முதல் நிலை கொலை மற்றும் தீபாவின் வயதான தாயை சுட்டுக் கொல்ல முயற்சி செய்ததற்காக குற்றவாளி என்று ஜூரிகள் கண்டறிந்தனர். கொலைக்கு சதி செய்ததாக இருவருக்குமே தண்டனை விதிக்கப்பட்டது.
கெர்ரின் நண்பரான கேரி சாமுவேல், அவரை சம்பவ இடத்திற்கு அழைத்துச் சென்று, கொலை செய்ததாகக் குற்றம் சாட்டப்பட்டார்.
குற்றம்சாட்டப்பட்ட 3வது நபர் ஆஷ்லே ஓவன் (துப்பாக்கிதாரி கெர்ரின் காதலி), கொலை செய்ய சதி செய்தல் மற்றும் கொலைக்குப் பிறகு கெருக்கு துணையாக இருப்பது அல்லது உதவி செய்தல் உள்ளிட்ட அனைத்து குற்றச்சாட்டுகளிலிருந்தும் விடுவிக்கப்பட்டார்.
ஜூரிகள் புதன்கிழமை பிற்பகலில் தங்கள் விவாதங்களைத் தொடங்கிய பின்னர் வெள்ளிக்கிழமை மாலை தீர்ப்பளிக்கப்பட்டது. ஏப்ரல் பிற்பகுதியில் விசாரணை தொடங்கியதில் இருந்து, ஜூரிகள் 26 சாட்சிகளின் வாக்குமூலங்களை பதிவு செய்தனர். அவர்களின் சாட்சியத்தை உச்ச நீதிமன்ற நீதிபதி ஆண்ட்ராஸ் ஷ்ரெக் தனது 130 பக்க சட்ட வழிமுறைகளில் சுருக்கமாகக் கூறினார்.
அரச வழக்கறிஞர்கள் சில்வானா கபோக்ரெகோ மற்றும் பென் ஸ்னோ இந்த வழக்கை “துரோகம் மற்றும் திட்டமிட்ட கொலையின் சோகமான கதை” என்று அழைத்தனர்.
அன்று காலை 9:40 மணியளவில், வீட்டு வாசலில் மணி அடிக்கும் சத்தம் கேட்டு, தாயார் கீழே இறங்கி வந்துள்ளார். பொதி விநியோக சேவையிலிருந்து வந்துள்ளதாக அந்த நபர்கள் தெரிவித்தனர். கீழே பேச்சு சத்தம் கேட்டதும், தீபா மாடியிலிருந்து கீழே இறங்கி வந்துள்ளார். அவர் வாசலுக்கு அண்மையாக வந்தபோது, கெர் வீட்டிற்குள் நுழைந்து தீபாவை பல முறை சுட்டுக் கொன்றார், பின்னர் அவரது தாயையும் சுட்டார். படுகாயமடைந்த தாயார், அதிர்ஸ்டவசமாக உயிர்பிழைத்து, இந்த சம்பவத்தின் முதலாவது சாட்சியாக உள்ளார்.
பொதியிடல் நிறுவனமொன்றில் பணியாற்றும் தீபா, இரவு பணி முடிந்து விட்டு சம்பவம் நடந்த அன்று காலை 7 மணியளவில் வீடு திரும்பியிருந்தார்.
தீப மற்றும் விஜேந்திரன் ஆகியோரின் 18 ஆண்டுகால மணவாழ்க்கையில் அண்மைக்காலமாக தகராறுகள் ஏற்பட்டதை, நீதிமன்றத்தில் சுட்டிக்காட்டப்பட்டது. தீபாவின் தங்கை முறையான ஒருவருடன் விஜேந்திரனுக்கு தகாத உறவு தொடங்கிய பின்னர் இந்த தகராறுகள் ஏற்பட்டன.
விஜேந்திரன் தொழிலில் வெற்றியடைந்து நிதி ரீதியாக நல்ல நிலையில் இருந்தார். வீடுகளை வாங்குதல், புதுப்பித்தல் மற்றும் விற்பது போன்றவற்றில் ஈடுபட்டிருந்தார். அவர் தனது மனைவியை மிகவும் கட்டுப்படுத்தி உடல் ரீதியாக துன்புறுத்தியதாக விசாரணையில் கூறப்பட்டது.
தற்போது நோர்வேயில் வசிக்கும் தீபாவின் இளைய உறவினருடன் புதிய வாழ்க்கையைத் தொடங்குவதற்காக, தீபா இறந்துவிட வேண்டும் என்று அவர் திட்டமிட்டதாக சட்டத்தரணிகள் வாதிட்டனர்.
விஜேந்திரன்- தீபா தம்பதிகளின் சிதைந்த உறவைப் பற்றி உறவினர்கள் பலர் சாட்சியமளித்தனர், அத்துடன் வன்முறை சம்பவங்களை விவரித்தனர்.
ஜூலை 2020 இல் விஜேந்திரன் காவல்துறைக்கு அளித்த வாக்குமூலத்தில், வீட்டை சுத்தம் செய்யாததாலும், குழந்தைகளை கவனித்துக் கொள்ளாததாலும், அவரிடம் திரும்பிப் பேசியதாலும் ஒருமுறை மனைவியை அடித்ததாக ஒப்புக்கொண்டார்.
இது ஒரு தனிமைப்படுத்தப்பட்ட நிகழ்வு அல்ல என்று சட்டத்தரணிகள் வாதிட்டாலும், பாதிக்கப்பட்டவர் சாட்சியமளிக்கவோ அல்லது குறுக்கு விசாரணை செய்யவோ அங்கு இல்லாததால், “இந்த ஆதாரத்தைப் பயன்படுத்தும்போது நீங்கள் கருத்தில் கொள்ள வேண்டிய வரம்புகள்” உள்ளன என்று நீதிபதி சட்டத்தரணிகளை எச்சரித்தார்.
அவரது உறவினர்கள் முதலில் காவல்துறையிடம் பேசியபோது திருமண முரண்பாடு பற்றி உடனடியாகத் தெரிவிக்கவில்லை என்பதை சட்டத்தரணிகள் ஒப்புக்கொண்டனர், ஆனால் கொலைக்குப் பின்னால் அவர்களது உறவினர் இருப்பதாக யாரும் சந்தேகிக்கவில்லை என்று வாதிட்டார்.
தீபாவின் தாயார், நீதிமன்றத்தில் சாட்சியமளித்தபோது, விஜேந்திரன் விவாகரத்து மிரட்டல் விடுத்ததாக கூறினார்.
இந்த வழக்கில் தொலைபேசி ஆதாரம் முக்கிய பங்கு வகித்தது.
பாலசுப்ரமணியம் தனது மனைவியின் கொலைக்கு எப்படி ஏற்பாடு செய்தார் என்பதை நிரூபிக்க ரோஜர்ஸ் தொலைபேசி பதிவுகள் மற்றும் செல்போன் பிரித்தெடுத்தல் ஆதாரங்களை சட்டத்தரணிகள் பயன்படுத்தினர்.
அவர் தனக்குச் சொந்தமான ஒரு கன்வீனியன்ஸ் ஸ்டோரில் வழக்கமான வாடிக்கையாளராக இருந்த ஓவனைத் தொடர்பு கொண்டார். அவர் கெரை அறிமுகப்படுத்தினார். தனது நெருங்கிய நண்பரான சாமுவேலை டிரைவராகவும் அவரது கூட்டாளியாகவும் நியமித்தார் என சட்டத்தரணிகள் சுட்டிக்காட்டினர்.
கொலை நடந்த இடத்திற்குச் சென்று வருவதற்கு ஒரு காரை வாடகைக்கு எடுப்பதற்கும், வீட்டிற்குள் நுழைவதற்கு ஒரு தந்திரமாக டெலிவரி பொக்ஸைப் பயன்படுத்துவதற்கும் இருவரும் திட்டம் தீட்டியதாக நடுவர் மன்றம் கூறியது.
கொலை நடப்பதற்கு முன்பு வீட்டில் பொருத்தப்பட்டிருந்த ஏராளமான கண்காணிப்பு கமராக்கள் பதிவாகாமல் நின்றுவிட்டன.
தொலைபேசி ஆதாரங்களுக்கு மேலதிகமாக, ஜூரிகள் புகைப்படங்கள், வீடியோ காட்சிகள் மற்றும் குற்றம் சாட்டப்பட்டவர்களின் நகர்வுகளை சுட்டிக்காட்டும் ஒரு தொகுப்பு வீடியோ ஆகியவற்றையும் கவனத்தில் கொண்டனர்.
விஜேந்திரனின் சட்டத்தரணி, குடும்ப வன்முறை ஆதாரங்கள் நம்பகமானவை அல்ல என்றும், அவரது மனைவி கொலைக்கு ஏற்பாடு செய்ததாக குற்றம் சாட்டப்படும் வரை சாட்சிகள் காவல்துறையிடம் இதுபோன்ற சம்பவங்கள் எதையும் குறிப்பிடவில்லை என்றும் வாதிட்டார்.
தனது மனைவியை கொல்வதற்காக கெருக்கு பணம் அனுப்பியதாக விஜேந்தரன் மீது குற்றம்சாட்டப்பட்டிருந்தாலும், தமிழ் கிறிஸ்தவ பிரார்த்தனை தேவாலயத்தில் பணிபுரியும் கட்டிடப் பொருட்கள் மற்றும் ஒப்பந்தக்காரர்களுக்கு அந்தப் பணம் செலுத்தப்பட்டதாக அவரது சட்டத்தரணி தெரிவித்தார்.
கெர்ரின் சட்டத்தரணி, அவர் துப்பாக்கிச் சூடு நடத்தியவர் அல்ல என்றும், நேரில் கண்ட சாட்சிகளை அடையாளம் காண்பதில் குறிப்பிடத்தக்க முரண்பாடுகள் இருப்பதாகவும் வாதிட்டார். கெர் தாக்குதலுக்காக பணம் பெற்றதற்கான எந்த ஆதாரமும் இல்லை, அல்லது அவரை கொலையுடன் தொடர்புபடுத்தும் உடல் அல்லது தடயவியல் ஆதாரங்கள் எதுவும் இல்லையென்றார்.
சாமுவேலின் சட்டத்தரணி, தனது வாடிக்கையாளர் நயாகரா நீர்வீழ்ச்சிக்கு வாரயிறுதியில் ஒரு காதல் பயணம் செல்ல ஒரு காரை வாடகைக்கு எடுத்ததாகவும், ஆனால் அறியப்படாத காரணங்களுக்காக, முர்ரேவுக்கு வருமாறு கெர் கேட்டதாகவும் ஜூரிகளிடம் கூறினார். அவர் காரை நிறுத்தி காத்திருந்த இடத்தில் இருந்து தீபாவின் வீடு தொலைவிலிருந்ததால், துப்பாக்கிச் சூட்டுச் சத்தம் கேட்டிருக்க மாட்டார் என ஆதாரங்கள் நிரூபிக்கின்றன என்று வாதிட்டார்.
கெர்ரின் காதலி ஓவனுக்கும் கொலைக்கும் எந்த தொடர்பும் இல்லை என்று அவரது சட்டத்தரணி வாதிட்டார். கொலைக்கு சற்று முன்பு கெர் அவளுக்கு அனுப்பிய ஒரு குறுஞ்செய்தியில் – “doing a ting for vj,”என்று குறிப்பிட்டார். விஜேந்திரனை vj என்றே அழைக்கிறார்கள்.
முதல் நிலை கொலைக்குற்றச்சாட்டுக்கு ஆயுள் தண்டனையே வழங்கப்படுகிறது. தண்டனை தொடர்பான விசாரணை ஜூன் 28ஆம் திகதி நடைபெற உள்ளது.




