நாடாளுமன்ற உறுப்பினர் அலி சப்ரி ரஹீம் தனது நாடாளுமன்ற சிறப்புரிமையைப் பயன்படுத்தி கடத்தலில் ஈடுபடுவதைக் கண்டித்துள்ள விவசாய அமைச்சர் மஹிந்த அமரவீர, நாடாளுமன்ற உறுப்பினர்களுக்கு விமான நிலையத்தின் பிரமுகர் முனையங்களில் சோதனையின்றி வருவதற்கு வழங்கப்பட்ட சலுகைகள் நீக்கப்பட வேண்டும் என்றார்.
அண்மையில் ஹம்பாந்தோட்டையில் நடைபெற்ற கூட்டமொன்றில் உரையாற்றிய அவர், இது திருட்டு மற்றும் மோசடிக்கு சமமானதாகும் என்றார்.
அலி சப்ரி ரஹீமின் நாடாளுமன்ற உறுப்பினர் பதவியை நீக்குவதற்கான பிரேரணை கொண்டு வரப்பட்டால் அதற்கு நான் ஆதரவளிப்பேன் என்றார்.
“இதுபோன்ற நாடாளுமன்ற சிறப்புரிமைகள் நீக்கப்பட வேண்டும் என்பது எனது கருத்து. நாடாளுமன்ற உறுப்பினர்களும் சாதாரண பயணிகள் முனையம் வழியாக வந்து சாதாரண பயணிகளைப் போல் சோதனை செய்யலாம். ஜனாதிபதி, பிரதமர் போன்ற பதவிகளில் உள்ளவர்களுக்கும், வெளிநாட்டு விருந்தினர்களுக்கு விஐபி டெர்மினல்கள் வழங்கலாம். எனினும் பாராளுமன்ற உறுப்பினர்களுக்கு அவ்வாறான சலுகைகள் தேவையில்லை என அமைச்சர் அமரவீர தெரிவித்துள்ளார்.
