எகிப்தில் உள்ள தொல்பொருள் ஆராய்ச்சியாளர்கள் சனிக்கிழமையன்று எகிப்தின் தலைநகரான கெய்ரோவிற்கு தெற்கே 30 கிலோமீட்டர் (சுமார் 18.5 மைல்) தொலைவில் உள்ள சக்காராவின் பண்டைய புதைகுழியில் 4,000 ஆண்டுகளுக்கு முந்தைய மனித மற்றும் விலங்குகளின் உடல்களை மம்மியாக பதப்படுத்தும் பட்டறைகள் மற்றும் கல்லறைகளை கண்டுபிடித்தனர்.
எகிப்தின் சுற்றுலா மற்றும் பழங்கால அமைச்சகம் இந்த தகவலை வெளியிட்டுள்ளது.
சுமார் 2,400 ஆண்டுகளுக்கு முன்பு ஆட்சி செய்த பண்டைய எகிப்தின் 30 வது வம்சத்தைச் சேர்ந்த மம்மி செய்யப்பட்ட மனிதர்கள் மற்றும் விலங்குகளை தங்க வைக்கும் பட்டறைகளே கண்டுபிடிக்கப்பட்டதாக தெரிவிக்கப்பட்டுள்ளது.
ஒரு பட்டறையில், ஆராய்ச்சியாளர்கள் “இறந்தவர் மம்மியாக பதப்படுத்துவதற்காக படுத்திருக்கும் கல் படுக்கைகள் பொருத்தப்பட்ட பல அறைகளைக் கண்டறிந்துள்ளனர்” என்று அமைச்சு கூறியது.
அதுமட்டுமின்றி, மனிதர்கள் மற்றும் புனித விலங்குகளை மம்மியாக மாற்றுவதற்கு பயன்படுத்தப்படும் மண் பானைகள் மற்றும் பிற பொருட்களும் சக்காராவில் உள்ள தளத்தில் கண்டுபிடிக்கப்பட்டன.
சக்காரா ஒரு காலத்தில் எகிப்தின் பண்டைய தலைநகரான மெம்பிஸின் ஒரு பகுதியாக இருந்தது என்று தொல்லியல் பொருட்கள் கவுன்சிலின் பொதுச்செயலாளர் முஸ்தபா வஜிரி கூறினார்.
“மிகப்பெரிய எம்பாமிங்கை நாங்கள் கண்டுபிடித்தோம் – நாங்கள் அதை வீடு – அல்லது பட்டறை என்று அழைக்கிறோம், ஒன்று மனிதர்களுக்கானது மற்றும் ஒன்று விலங்குகளுக்கானது” என்று யுனெஸ்கோ உலக பாரம்பரிய தளத்தில் செய்தியாளர்களிடம் வஜிரி கூறினார் என்று ரொய்ட்டர்ஸ் செய்தி நிறுவனம் தெரிவித்துள்ளது.
பட்டறைகள் மற்றும் கல்லறைகள் 30 வது பாரோனிக் வம்சம் (கிமு 380 முதல் கிமு 343 வரை) மற்றும் தாலமிக் காலம் (கிமு 305 முதல் கிமு 30 வரை) என்று அவர் கூறினார்.
விலங்குப் பட்டறை மண் மற்றும் கல் தளங்களைக் கொண்டு உருவாக்கப்பட்டது. மம்மியாக்கம் செயல்பாட்டில் பயன்படுத்தப்படும் வெண்கலக் கருவிகளும் அங்கு காணப்பட்டது.
கல்லால் செய்யப்பட்ட ஐந்து படுக்கைகள் அறைக்குள் கண்டுபிடிக்கப்பட்டன. அவை மிகவும் புனிதமான விலங்குகளை மம்மியாக மாற்றப் பயன்படும்.
கல்லறைகள் இரண்டு மதகுருக்களுக்கு சொந்தமானவை. கிமு 24 ஆம் நூற்றாண்டு மற்றும் கிமு 14 ஆம் நூற்றாண்டைச் சேர்ந்த மதகுருக்களின் கல்லறைகளே கண்டுபிடிக்கப்பட்டன.
பழைய இராச்சியத்தின் ஐந்தாவது வம்சத்தில் ஹோரஸ் மற்றும் மாட் கடவுள்களின் எழுத்தர்களின் தலைவராகவும் மதகுருவாகவும் இருந்த நே ஹெசுட் பா என்பவருக்குச் சொந்தமானது.
இரண்டாவது கல்லறை 18 வது வம்சத்தைச் சேர்ந்த மென் கேபர் என்ற காதிஷ் மதகுருவுக்கு சொந்தமானது (கிமு 1400 இல்). அவரது கல்லறை பாறையில் செதுக்கப்பட்டது.
இது 1 மீட்டர் நீளமுள்ள (தோராயமாக 1 கெஜம்) அலபாஸ்டர் சிலையையும் கொண்டிருந்தது.
சக்காரா தொல்பொருள் தளத்தின் இயக்குனர் முகமது யூசுப் கூறுகையில், கல்லறைச் சுவர்கள் “அன்றாட வாழ்க்கை, விவசாயம் மற்றும் வேட்டையாடும் காட்சிகளின்” சித்தரிப்புகளால் அலங்கரிக்கப்பட்டுள்ளன.
சுற்றுலாவை மேம்படுத்த எகிப்திய அரசாங்கம் புதிய தொல்பொருள் கண்டுபிடிப்புகளுக்கு வலுவாக அழுத்தம் கொடுத்து, அவற்றை சர்வதேச ஊடகங்கள் மற்றும் இராஜதந்திரிகளுக்குக் காட்சிப்படுத்துகிறது.
கெய்ரோ அரசியல் கொந்தளிப்பு மற்றும் கோவிட்-19 தொற்றுநோய் மற்றும் உக்ரைனில் ஏற்பட்ட மோதலின் வீழ்ச்சியால் பாதிக்கப்பட்ட தொழில்துறைக்கு புத்துயிர் அளிப்பதை நோக்கமாகக் கொண்டுள்ளது.
