சீன யுவான் வாங்-5 கப்பல் இன்று காலை ஹம்பாந்தோட்டை துறைமுகத்தை வந்தடைய உள்ளதாக இந்திய ஊடகங்கள் தெரிவிக்கின்றன. இந்த கப்பலின் இலங்கைக்கான பயணத்தை ஒத்திவைக்குமாறு வெளிவிவகார அமைச்சு கோரிக்கை விடுத்த போதிலும், கப்பலின் பயணம் நிறுத்தப்படவில்லை.
சீனக் கப்பலின் இலங்கைப் பயணம் குறித்து இந்தியா மிகவும் கவலையடைந்துள்ளது. இது சீனாவின் உளவு கப்பல் என்று இந்தியா தெரிவித்துள்ளது. இதனால், இந்தியாவின் தென்பிராந்தியத்திலுள்ள கேந்திர நிலையங்கள் வேவு பார்க்கப்படும் என தெரிவித்துள்ளது.
சீன கப்பலின் வருகையை தடுத்து நிறுத்துமாறு இந்திய தரப்பினால், ஜனாதிபதி ரணிலுக்கு நேரடியாக தெரிவிக்கப்பட்டது.
இந்தியாவின் ஆட்சேபனை காரணமாக, இந்த கப்பலின் பயணத்தை ஒத்திவைக்க இலங்கை அரசு கோரிக்கை விடுத்தது.
இந்தக் கப்பல் இந்தோனேசியக் கடலில் மணிக்கு 26 கிலோமீட்டர் வேகத்தில் பயணித்துக் கொண்டிருப்பதாக சர்வதேச ஊடகங்கள் செய்தி வெளியிட்டிருந்தன.
யுவான் வாங்-5 கப்பலில் 400 பணியாளர்கள் உள்ளனர். இந்த கப்பலின் இலங்கை பயணம் பற்றி மற்ற தரப்பினர் கவலைப்பட வேண்டாம் என்றும் சீனா தெரிவித்துள்ளது.
இந்த கப்பலின் பணத்திற்கு ஜூலை நடுப்பகுதியில் இலங்கை அனுமதியளித்த பின்னர், இந்திய எதிர்ப்பையடுத்து சீன கப்பலின் வருகையை தள்ளிவைக்குமாறு கோரியிருந்தது. எனினும், அதனை மீறி சீன கப்பல் இலங்கைக்குள் நுழையவுள்ளதாக இந்திய ஊடகங்கள் தெரிவிக்கின்றன.
இந்த நிலைமையில் இந்தியா, சீனா பூகோள போட்டியில் இலங்கை சிக்கியுள்ளது.
