எரிவாயு சிலிண்டர் விலையை உயர்த்துவது குறித்து இன்று முடிவு எடுக்கப்பட உள்ளது.
எரிவாயு சிலிண்டர்களின் விலையை அதிகரிக்குமாறு லிட்ரோ எரிவாயு நிறுவனம் கோரிக்கை விடுத்துள்ளதாக அமைச்சரவை இணைப் பேச்சாளர் அமைச்சர் ரமேஷ் பத்திரன உறுதிப்படுத்தியுள்ளார்.
கொழும்பில் இன்று நடைபெற்ற வாராந்த அமைச்சரவை ஊடகவியலாளர் சந்திப்பின் போது கருத்து தெரிவித்த அமைச்சர் பத்திரன, செலவு அதிகரிப்பு காரணமாக உடனடியாக விலை அதிகரிப்பு தேவை என நிறுவனம் சுட்டிக்காட்டியதாக தெரிவித்தார்.
நிறுவனத்தின் நிதி ஸ்திரத்தன்மையை உறுதி செய்யும் வகையில் இந்த கோரிக்கை விடுக்கப்பட்டுள்ளதாக அவர் கூறினார்.
எவ்வாறாயினும், எரிவாயு விலையை அதிகரிப்பதற்கு இதுவரை அனுமதி வழங்கப்படவில்லை என அமைச்சர் ரமேஷ் பத்திரன தெரிவித்துள்ளார்.
எரிவாயு இறக்குமதி மற்றும் ஏனைய செலவுகள் தொடர்பிலான அறிக்கைகள் இன்று ஆராயப்பட்டு தீர்மானம் அறிவிக்கப்படும் என அமைச்சர் மேலும் தெரிவித்தார்.
இதற்கிடையில், லிட்ரோ எரிவாயு நிறுவனம் புதிய எல்பி எரிவாயு சிலிண்டர் விலையை இன்று பின்னர் அறிவிக்கும் என்று தெரிவிக்கப்பட்டுள்ளது.
