வாடிக்கையாளர்களுடன் பாலியல் உறவு வைத்துக்கொள்ளுமாறு தங்களிடம் வேலை செய்யும் நடன அழகிகளை வற்புறுத்திய சிங்கப்பூரின் இரண்டு கேளிக்கை மைய உரிமையாளர்களுக்குச் சிறைத் தண்டனையும் அபராதமும் விதிக்கப்பட்டுள்ளன.
சிங்கப்பூரை சேர்ந்த 60 வயது ராஜேந்திரன் நாகரத்தினம் மீது ஆறு குற்றச்சாட்டுகள் சுமத்தப்பட்டிருந்தன.
மற்றொருவரான இலங்கைப் பின்னணியுடைய 46 வயது அருமைக்கண்ணு சசிகுமார் மீது மூன்று குற்றச்சாட்டுகள் சுமத்தப்பட்டிருந்தன.
ராஜேந்திரனுக்கு முதலில் 30 மாதச் சிறைத் தண்டனையும் 3,000 வெள்ளி அபராதமும் விதிக்கப்பட்டன. அவர் மேல்முறையீடு செய்ததைத் தொடர்ந்து உயர் நீதிமன்றம் சிறைத் தண்டனையை 19 மாதங்களாகக் குறைத்தது, அபராதத் தொகையை 2,500 வெள்ளியாகக் குறைத்தது.
தற்போது, சிங்கப்பூர் நிரந்தரவாசியான சசிகுமாருக்கு 16 மாதச் சிறைத் தண்டனையும் 11,000 வெள்ளி அபராதமும் விதிக்கப்பட்டன. அவரின் மேல்முறையீட்டு மனு நிராகரிக்கப்பட்டது.
‘கோலிவுட்’ என்ற தங்களின் கேளிக்கை மையத்திற்கு வரும் வாடிக்கையாளர்களை உல்லாசமாக வைத்திருக்க பல அழகிகளை நடனத்திற்காக பணிக்கமர்த்தியிருந்தனர்.
அவர்களில் பங்ளாதேஷைச் சேர்ந்த இரண்டு பெண்களான அக்தர் பித்தி, அக்தர் டினா ஆகியோரை வீட்டு பணியாளர்களென அழைத்து, நடன அழகிகளாக பணிக்கமர்த்தினர். இந்த காலப்பகுதியில் வாடிக்கையாளர்களுடன் பாலியல் உறவு வைத்துக்கொள்ளுமாறு இருவரும் வற்புறுத்தியுள்ளனர்.
பித்தி செப்டம்பர் 7, 2015 அன்று சிங்கப்பூர் வந்தார். டினா ஜனவரி 16, 2016 அன்று வந்தார். அவர்கள் அப்போது 20 களின் நடுப்பகுதியில் இருந்தனர்.
சசிகுமார் தனது சம்பளத்தை நிறுத்திவிடுவார் என்று அச்சப்பட்டதால் பித்தி தயக்கத்துடன் இரண்டு வாடிக்கையாளர்களுடன் உடலுறவு கொள்ள ஒப்புக்கொண்டார். ஒவ்வொரு வாடிக்கையாளரும் அவருக்கு 500 சிங்கப்பூர் டொலர் செலுத்தினர், அதை அவர் சசிகுமாருக்கு அனுப்பினார்.
பங்ளாதேஷைச் சேர்ந்த ரோக்கி என்ற மற்றோர் ஊழியரின் உதவியுடன் ராஜேந்திரனும் சசிகுமாரும் அப்பெண்களை பாலியல் உறவில் ஈடுபடுமாறு கூறிஇருக்கின்றனர்.
டினா பாலியல் உறவு வைத்துக்கொள்ள மறுத்தார். ராஜேந்திரன் 50 மற்றும் 100 டொலர் நோட்டுகளைக் காட்டிய பிறகும், வாடிக்கையாளர்களுடன் உடலுறவு கொள்ள டினா உறுதியாக மறுத்துவிட்டார்.
கோபமாக, அவரை அறைந்த ராஜேந்திரன், கழுத்தையும் நெரித்தார்.
பிப்ரவரி 11, 2016 அதிகாலையில், பித்தி, திடினா மற்றும் இரண்டு பெண்கள் அவர்கள் தங்கியிருந்த இடத்தை விட்டு வெளியேறினர்.
ஒரு நண்பரின் உதவியுடன், அவர்கள் தங்களுக்கு சம்பளம் வழங்கப்படவில்லை மற்றும் வாடிக்கையாளர்களுடன் உடலுறவு கொள்ள கட்டாயப்படுத்தப்பட்டதாக மனிதவள அமைச்சகத்திற்கு அறிக்கை அளித்தனர்.
பித்தியைப் பாலியல் தொழிலில் ஈடுபட வைத்தது, அதன் மூலம் கிடைத்த வருமானத்தைப் பயன்படுத்தியது, கைதாவதிலிருந்து தப்பிக்க ரோக்கியை சிங்கப்பூரைவிட்டு வெளியேற ஏற்பாடு செய்தது உள்ளிட்ட குற்றச்சாட்டுகளை ராஜேந்திரனும், சசிகுமாரும் தற்போது எதிர்நோக்கியுள்ளனர்.
