மத்திய அரசின் புதிய சமூக வலைதள விதிகளுக்கு கட்டுப்படாமல் இருக்கும் நிறுவனங்களுக்கு தடை விதிக்கப்படவுள்ளதாக தகவல் வெளியாகியுள்ளது
ஃபேஸ்புக், வாட்ஸ் அப், ட்விட்டர் உள்ளிட்ட சமூக வலைத்தளங்களில் நாட்டின் பாதுகாப்புக்கும், இறையாண்மைக்கும் எதிராக தகவல்கள் பகிரப்படுவதாக புகார்கள் எழுந்தன. இதனையடுத்து, ஓ.டி.டி. தளங்கள் உட்பட அனைத்து சமூக ஊடகங்களையும் கட்டுப்படுத்தும் நோக்கில் கடந்த பிப்ரவரியில் ஒழுங்குமுறை விதிகளை மத்திய அரசு வெளியிட்டது.
இந்த விதிகளை அமல்படுத்துவதற்கான காலக்கெடு இன்றுடன் நிறைவடைகிறது. ஆனால் விதிகளை அமல்படுத்த ஃபேஸ்புக், வாட்ஸ் அப், இன்ஸ்டாகிராம், ட்விட்டர் உள்ளிட்ட நிறுவனங்கள் 6 மாத காலம் அவகாசம் கேட்டிருந்த நிலையில், அமெரிக்காவில் உள்ள தலைமை நிறுவனங்களிடம் இருந்து இன்னும் எந்த அறிவுறுத்தல்களும் வழங்கப்படவில்லை என தெரிகிறது. இந்தியாவை சேர்ந்த கூ ஆப் மட்டும் புதிய சமூக ஊடக வழிகாட்டுதல்களுக்கு இணங்குவதாக தெரிவித்துள்ளது.
இதனால் புதிய விதிகளுக்கு இணங்காத அனைத்து சமூக ஊடகங்களுக்கும் தடை விதிப்பது மட்டுமின்றி குற்றவியல் நடவடிக்கையும் எடுக்க மத்திய அரசு முடிவு செய்துள்ளதாக தகவல் வெளியாகியுள்ளது. எனவே, இந்திய அரசின் இடைநிலை வழிமுறைகள் மற்றும் டிஜிட்டல் ஊடக நெறிமுறை விதிகள், 2021ன் கீழ் செயல்படாத காரணங்களால் ஃபேஸ்புக், ட்விட்டர் போன்ற சமூக வலைத்தளங்களுக்கு நாளை முதல் தடை விதிக்கப்படுமா என கேள்வி எழுந்துள்ளது.
முன்னதாக, பிரதமர் மோடி மற்றும் இந்தியாவின் பெயருக்கு அவமதிப்பை ஏற்படுத்தும் வகையில், டூல்கிட் ஒன்றை காங்கிரஸ் உருவாக்கியுள்ளதாக பாஜக குற்றம் சாட்டியது. ஆனால், காங்கிரஸ் கட்சி அதனை திட்டவட்டமாக மறுத்துடன், தவறான தகவல்களை பரப்பும் சில பாஜக தலைவர்களின் ட்விட்டர் கணக்குகளை நிரந்தரமாக முடக்க வேண்டும் என ட்விட்டர் நிறுவனத்திற்கு அக்கட்சி கடிதம் எழுதியது.
இதையடுத்து, சில பாஜக தலைவர்களின் ட்விட்டர் பதிவுகளை சந்தேகத்திற்கிடமானது என்ற முத்திரையுடன் ட்விட்டர் வகைப்படுத்தியது. அதன் தொடர்ச்சியாக, இதுகுறித்து ட்விட்டர் நிறுவனத்திடம் விளக்கம் கேட்ட டெல்லி போலீஸ், கூர்கான், டெல்லி உள்ளிட்ட இடங்களில் உள்ள ட்விட்டர் அலுவலகத்தில் சோதனை மேற்கொண்டது என்பது கவனிக்கத்தக்கது.
ட்விட்டர், ஃபேஸ்புக் போன்ற சமூக ஊடக நிறுவனங்கள் குறிப்பிட்ட கட்சிகளுக்கு ஆதரவாக செயல்படாமல் மதரீதியான அவதூறுகள் உள்ளிட்டவற்றுக்கு நடவடிக்கை எடுத்து, தனிநபர் கணக்குகளைத் தன்னிச்சையாக முடக்காமல் பொதுவானதாக இருக்க வேண்டும் என்ற குரல்களும், அது போன்ற சமூக வலைதளங்களை தடை செய்தால் தகவல் பரிமாற்றம் உள்ளிட்ட பல விஷயங்கள் மக்களை சென்றடைய தாமதமாகும் என்பதால், விதிமுறைகளை ஒழுங்குபடுத்த வேண்டும் என்ற கோரிக்கைகளும் எழுந்துள்ளன
