ஆஸ்திரேலியா, இங்கிலாந்து அணிகள் பங்கேற்கும் ஆஷஸ் டெஸ்ட் தொடர் 2021- 2022ஆம் ஆண்டிற்கான அட்டவணை தற்போது வெளியாகியுள்ளது.
ஆஸ்திரேலியாவில் நடைபெறும் இந்த டெஸ்ட் தொடரின் முதல் போட்டி பிரிஸ்பேனில் டிசம்பர் 8 முதல் 12ஆம் தேதி வரை நடைபெறவுள்ளது. இரண்டாவது போட்டி பகலிரவு ஆட்டமாக அடிலைட் மைதானத்தில் டிசம்பர் 16 முதல் 20ஆம் தேதி வரை நடைபெறும்.
மூன்றாவது போட்டி பாக்ஸிங் டே டெஸ்ட் போட்டியாக நடைபெறும் என அறிவிக்கப்பட்டுள்ளது. இப்போட்டி மெல்போர்னிலும் (டிசம்பர் 26–30) அடுத்த போட்டி சிட்னியிலும் (ஜனவரி 5-9) நடைபெறும் என ஆஸ்திரேலிய கிரிக்கெட் வாரியம் அறிவித்துள்ளது.
கடைசி டெஸ்ட் மாற்றம்:
கடந்த 26 வருடங்களில் கடைசி ஆஷஸ் போட்டி சிட்னியில்தான் நடத்தப்பட்டது. ஆனால் தற்போது கடைசிப் போட்டி பெர்த்தில் (ஜனவரி 14-18) நடைபெறும் என அறிவிக்கப்பட்டுள்ளதால், இது ரசிகர்கள் மத்தியில் கவலையை ஏற்படுத்தியுள்ளது. ஆஸ்திரேலிய கிரிக்கெட் வாரியம் இந்த அறிவிப்பை திரும்ப பெற்று பழைய நடைமுறையைத் தொடர வேண்டும், அது நமக்கு ராசியான மைதானம் என ரசிகர்கள் சமூக வலைத்தளங்களில் பதிவிட்டு வருகின்றனர்.
டி20 தொடர்:
ஆஷஸ் தொடர் முடிந்த பிறகு தலா மூன்று போட்டிகள் கொண்ட டி20, ஒருநாள் தொடர் ஆரம்பமாகும். முதலிரண்டு டி20 போட்டி சிட்னியிலும் (பிப்ரவரி 4,6) கடைசிப்போட்டி 10ஆம் தேதி அடிலைடிலும் நடைபெறவுள்ளது.
ஒருநாள் தொடர்:
மூன்று போட்டிகள் கொண்ட ஒருநாள் தொடரின் முதல் போட்டி அடிலைடில் பிப்ரவரி 13ஆம் தேதி நடைபெறும். கடைசி இரண்டு போட்டிகள் மெர்போர்னில் (பிப்ரவரி 4,6) நடைபெறும் என ஆஸ்திரேலிய கிரிக்கெட் வாரியம் அறிவித்துள்ளது.
இப்போட்டியில் பார்வையாளர்கள் அனுமதிக்கப்படுவார்களா? மருத்துவ பாதுகாப்பு வட்டம் எவ்வாறு கடைப்பிடிக்கப்படும் என்பது குறித்து விரைவில் அறிவிக்கப்படும் எனக் கூறப்பட்டுள்ளது.
