ஹார்திக் பாண்டியா பந்துவீசவில்லை என்றால் இந்திய அணிக்கு விளையாட தகுதியற்றவர் என முன்னாள் வீரர் சரண்தீப் சிங் பேசியுள்ளார்.
2019ஆம் ஆண்டில் அறுவை சிகிச்சை செய்துகொண்ட ஹார்திக் பாண்டியா, அதன்பிறகு தொடர்ந்து பந்துவீசாமல் இருந்து வருகிறார். சமீபத்தில் நடைபெற்ற ஆஸ்திரேலியா, இங்கிலாந்து அணிகளுக்கு எதிரான கிரிக்கெட் தொடர்களில் சில ஓவர்கள் மட்டுமே வீசினார். ஐபிஎல் 14ஆவது சீசனில் ஒரு பந்துகூட வீசவில்லை.
ஹார்திக் பாண்டியா தொடர்ந்து பந்துவீசாமல் இருப்பதால், உலக டெஸ்ட் சாம்பியன்ஷிப் தொடருக்கான இறுதிப் போட்டியில் பங்கேற்கும் இந்திய அணியில் இவருக்கு இடம் கிடைக்கவில்லை. இந்த விவகாரம் குறித்து தற்போது பேசியுள்ள இந்திய அணி முன்னாள் வீரர் சரண்தீப் சிங், ஹார்திக் பாண்டியாவால் பந்துவீச முடியாமல் போகும்பட்சத்தில், அவருக்கு டெஸ்ட் அணியில் மட்டுமல்ல இந்திய அணியிலும் இடம் தரக் கூடாது எனத் தெரிவித்துள்ளார்.
“உலக டெஸ்ட் சாம்பியன்ஷிப் தொடரின் இறுதிப் போட்டியில் பங்கேற்கும் இந்திய அணி வீரர்கள் பட்டியலில் ஹார்திக் பாண்டியாவின் பெயர் இடம்பெறாதது சரியான முடிவுதான். தேர்வாளர்கள் சிறப்பான முறையில் அணியைத் தேர்வு செய்திருக்கிறார்கள். பாண்டியா, அறுவை சிகிச்சை செய்த பிறகு பந்துவீசவில்லை. இங்கிலாந்து, ஆஸ்திரேலிய சுற்றுப் பயணங்களில் ஒரு சில ஓவர்கள் மட்டுமே வீசினார். அவர் ஒரு பேட்ஸ்மேனாக மட்டும் அணியில் நீடிக்க முடியாது” எனத் தெரிவித்தார்.
மேலும் பேசிய இவர், “ஹார்திக் ஒரு ஆல்-ரவுண்டர். அவரால் பந்துவீச முடியவில்லை என்றால் அணிக்கு கூடுதலாக ஒரு பந்துவீச்சாளரைச் சேர்க்க வேண்டிய நிலை ஏற்படும். இதனால், சூர்யகுமார் யாதவ் போன்ற பேட்ஸ்மேன்களுக்கு அணியில் இடம் கிடைக்காது. இங்கிலாந்து, ஆஸ்திரேலிய சுற்றுப் பயணங்களின்போது கூட, வாஷிங்டன் சுந்தர், அக்சர் படேல், ரவீந்திர ஜடேஜா, ஷார்துல் தாகூர் போன்றவர்கள் இவரின் இடத்தை நிரப்பும் வகையில் விளையாடினார்கள். ஒரு வீரர் தன்னுடைய வேலையைச் சரியாக செய்யவில்லை என்றால் ஒட்டுமொத்த அணிக்கும் அது பெரிய பாதிப்பை ஏற்படுத்தும். இதனால், விரைவில் புதிய வேகப்பந்து வீச்சு ஆல்-ரவுண்டரை தேர்வு செய்ய வேண்டும்” எனத் தெரிவித்தார்.
சமீபத்தில் பேட்டிகொடுத்த இந்திய பௌலிங் கோச் பரத் அருண், “இந்திய அணிக்கு புதிய வேகப்பந்து வீச்சு ஆல்-ரவுண்டர் கிடைத்துவிட்டார். இது ஷார்துல் தாகூர்தான். திறமையை நிரூபிக்க ஷார்துலுக்கு தொடர்ந்து வாய்ப்பு வழங்கப்படும்” எனக் கூறியிருந்தார் என்பது குறிப்பிடத்தக்கது.
