புத்தளம், ஹலவத்த பொலிஸ் பிரிவிற்குட்பட்ட சிங்கபுரா பகுதியில் ஒரே குடும்பத்தை சேர்ந்த மூவர் மர்மமாக மரணமடைந்திருந்தது தொடர்பில் பொலிஸார் பல உண்மைகளை வெளிக்கொண்டு வந்துள்ளனர்.
பொலிஸாரின் முதற்கட்ட விசாரணையில், அந்த வீட்டில் இருந்த தந்தையே தனது மகள் மற்றும் மனைவியைக் கொன்றதுடன், தானும் தீயில் எரிந்தது தெரியவந்துள்ளது.
கோடீஸ்வர தொழிலதிபரின் வீட்டில் நடந்த மூன்று மரணங்களும் வெளியுலகத் தொடர்பு இல்லாமல் வீட்டிற்குள் நடந்த சில சம்பவங்களின் விளைவு என்று பொலிசார் சந்தேகிக்கின்றனர்.
அரச பரிசோதகர் நேற்று (20) குறித்த இடத்தை பார்வையிட்டதாகவும், பரிசோதகரின் அறிக்கையின் பிரகாரம் இது கொலையா அல்லது தற்கொலையா என்பது தெரியவரும் என பொலிஸ் ஊடகப் பேச்சாளர் டிஐஜி சட்டத்தரணி நிஹால் தல்துவா தெரிவித்தார்.
அதுமட்டுமின்றி, இந்த மரணங்கள் தொடர்பான பல முக்கிய தகவல்கள் பிரேத பரிசோதனையின் மூலம் தெரியவரும் என ஹலவத்த பொலிஸார் குறிப்பிடுகின்றனர்.
மேலும், குற்றம் நடந்த வீட்டின் கதவுகள் மற்றும் ஜன்னல்கள் அனைத்தும் பூட்டப்பட்டிருந்ததாகவும், வீட்டில் தீ பரவியதாக பொலிஸாருக்கு கிடைத்த தகவலின் பேரில் ஹலவத்தை தீயணைப்பு பிரிவினர் அங்கு சென்று வீட்டு கதவுகளை உடைத்து உள் பிரவேசித்ததாகவும் பொலிஸார் தெரிவிக்கின்றனர்.
சம்பவ இடத்தில் இரத்தக் கறைகள் காணப்படுவதாகவும் வீட்டின் கதவு உள்பக்கமாக பூட்டப்பட்டிருந்ததாகவும் பொலிஸ் ஊடகப் பேச்சாளர் தெரிவித்தார். அதுமட்டுமல்லாமல், வீட்டின் ஜன்னல்கள், மற்ற கதவுகள் என அனைத்து கதவுகளும் உள்பக்கமாக பூட்டப்பட்டிருந்ததால், நேற்று மாலை வரை போலீசார் நடத்திய சோதனையில், வெளியில் இருந்து யாரும் வீட்டுக்குள் நுழைந்ததற்கான, வீட்டை விட்டு வெளியே சென்றதற்கான எந்த ஆதாரமும் கிடைக்கவில்லை.
இந்த 3 பேரின் உடல்களையும் பொலிசார் நேற்று காலை கண்டெடுத்தனர். 52 வயதான வர்த்தகர் எஸ்.ஜி சேனாரத்ன, அவரது மனைவி மஞ்சுளா நிரோஷனி, 43 மற்றும் 15 வயதான மகள் நெத்மி நிமேஷா ஆகியோர் உயிரிழந்துள்ளனர்.
தொழிலதிபர் எஸ்.ஜி.சேனாரத்ன ஹலவத்தை நகரில் பேர்ல் லான்ட் சேல் என்ற பெயரில் காணிகளை பிரித்து விற்பனை செய்யும் தொழிலை நடத்தி வருகின்றார். அவரது மனைவி மஞ்சுளா நிரோஷனி ஹலவத்தை பிரதேச செயலகத்தின் முன்னேஸ்வரம் களத்திற்கு பொறுப்பான அபிவிருத்தி உத்தியோகத்தராக கடமையாற்றி வருகின்றார்.மகள் ஹலவத்த ஆனந்த தேசிய பாடசாலையின் தரம் 10F இல் கல்வி பயில்கிறார்.
வீட்டின் மாடி அறையில் மனைவி கழுத்து அறுக்கப்பட்ட நிலையில் கொலை செய்யப்பட்டுள்ளார். சடலத்தை பரிசோதித்ததில், நேற்று முன்தினம் (19) காலை அல்லது பிற்பகலில் கழுத்தை அறுத்து கொலை செய்யப்பட்டிருப்பது தெரியவந்துள்ளது.
பிரேத பரிசோதனையில் இது தொடர்பான தெளிவான முடிவு உறுதி செய்யப்படும் என்று மூத்த பொலிஸ் அதிகாரி ஒருவர் தெரிவித்தார்.
தொழிலதிபர் மற்றும் அவரது 15 வயது மகளின் சடலங்கள் வீட்டின் அறையில் இருந்து கண்டெடுக்கப்பட்டுள்ளன. விசாரணையில், வீட்டில் உள்ள வீட்டு உபயோகப் பொருட்கள் மற்றும் பிற பொருட்களில் எரிபொருளை பயன்படுத்தி உடல்கள் தீ வைத்து எரிக்கப்பட்டதையும் போலீசார் கண்டுபிடித்துள்ளனர்.
இருவரின் உடல்களும் தீயில் கருகியுள்ளன. உடல்கள் அடையாளம் காண முடியாத அளவுக்கு சேதமடைந்தன. வீட்டின் கீழ் தளம் முழுவதும் தீ பரவியதாக பொலிசார் தெரிவித்தனர்.
இந்த வர்த்தகர் நேற்று (19) பிற்பகல் வீட்டில் தங்கியிருந்ததாகவும், அவரது மகள் பயிற்சி வகுப்பில் கலந்துகொள்வதற்காக வீட்டை விட்டு வெளியே சென்றுள்ளதாகவும் விசாரணையில் தெரியவந்துள்ளது.
அவர் பயிற்சி வகுப்பு முடிந்து தனது தோழியின் வீட்டிற்கு சென்றதாகவும், இரவு 8.15 மணியளவில் தொழிலதிபர் அவரை மோட்டார் சைக்கிளில் தோழியின் வீட்டில் இருந்து அழைத்துச் சென்றதாகவும் பொலிஸார் தெரிவிக்கின்றனர்.
வீட்டுக்கு வந்ததும் மகள் கொல்லப்பட்டார். அவரது தாயார் ஏற்கனவே வீட்டின் மாடி அறையில் படுகொலை செய்யப்பட்டிருக்கலாம் என பொலிஸார் சந்தேகிக்கின்றனர். வீட்டிற்கு வந்த சிறிது நேரத்தில் அவர் கொலை செய்யப்பட்டிருக்கலாம் என போலீசார் சந்தேகிக்கின்றனர்.
இந்த வர்த்தகர் கடந்த காலங்களில் தனது வியாபார நடவடிக்கை காரணமாக பல நிதி பிரச்சினைகளில் ஈடுபட்டுள்ளதாகவும் பொலிஸாருக்கு தகவல் கிடைத்துள்ளது.
விசாரணையின் போது ஹலவத்த – குருநாகல் வீதியில் வர்த்தகரின் மனைவிக்கு சொந்தமான 5 ஏக்கர் காணி இருப்பதாகவும் அந்த காணியை வர்த்தகர் விற்பனை செய்ய முயற்சிப்பதாகவும் பொலிஸாருக்கு தகவல் கிடைத்தது.
இதற்கு மனைவி மறுப்பு தெரிவித்ததால் இருவருக்கும் இடையே தகராறு ஏற்பட்டதாகவும் பொலிசாருக்கு தகவல் கிடைத்துள்ளது.
தகராறு காரணமாகவே தொழிலதிபர் தனது மனைவி மற்றும் குழந்தையைக் கொன்று தற்கொலை செய்து கொண்டுள்ளதாகவும் பொலிஸார் சந்தேகம் வெளியிட்டுள்ளனர்.
அது தொடர்பில் உறுதியான முடிவு எட்டப்படவில்லை எனவும், அரச பகுப்பாய்வாளர் மற்றும் சட்ட வைத்திய பரிசோதனைகளின் பின்னர் தெளிவான தகவல்கள் வெளியாகும் எனவும் நிஹால் தல்துவ குறிப்பிட்டார்.
ஹலவத்த நகரின் மக்கள் செறிவாக வாழும் பகுதியான சிங்கபுர பகுதியில் வசிப்பவர்கள், வீடு எரிவதைத் தவிர, காலை வரை வீட்டில் இருந்து எந்த சத்தத்தையும் கேட்கவில்லை என்றும் பொலிசார் கூறுகின்றனர்.
நேற்று காலை வீட்டில் தீ பரவியதை அயலவர்கள் மாத்திரமே பார்த்துள்ளதாகவும், அயலவர்கள் வழங்கிய தகவலின் அடிப்படையில் பொலிஸாரும் தீயணைப்பு படையினரும் அங்கு வரவுள்ளதாக பொலிஸார் குறிப்பிடுகின்றனர்.
