15 வயதுடைய பாடசாலை மாணவியை பாலியல் துஷ்பிரயோகத்திற்கு உட்படுத்தியதாக கூறப்படும் மாரவில தேவாலயம் ஒன்றின் பாதிரியார், தனக்கு எதிராக சுமத்தப்பட்டுள்ள பொய்யான குற்றச்சாட்டுகள் தொடர்பில் நியாயமான தீர்ப்பை பெற்று பிரச்சினைக்கு தீர்வு காண விரும்புவதாக தெரிவித்துள்ளார்.
சமூக ஊடகங்களில் பதிவேற்றம் செய்யப்பட்ட அறிக்கையில், சம்பந்தப்பட்ட பாதிரியார் நியாயமான தீர்ப்பின் மூலம் அவர் தொடர்பான பிரச்சினையைத் தீர்க்க விரும்புவதாகக் கூறினார்.
“சுதந்திரமாகவோ அல்லது தூண்டுதல் மூலமாகவோ என் மீது குற்றச்சாட்டுகளை முன்வைத்த அனைவருக்கும் நன்றி. எனக்கு ஆதரவாக வந்த திருச்சபையினருக்கும் நன்றி. இந்த இக்கட்டான நேரத்தில் திருச்சபையினர் என் மீது காட்டிய அன்புதான் எனக்கு எஞ்சியிருக்கும் அழகான விஷயம்” என்று அவர் மேலும் கூறினார்.
இதற்கிடையில், இந்த விவகாரம் நீதிமன்றத்தின் முன் இருப்பதால், சம்பந்தப்பட்ட பாதிரியார் குறித்து திருச்சபையால் எதுவும் கூறவோ அல்லது முடிவு செய்யவோ முடியாது என்று சிலாபம் ஆயர் வலன்ஸ் மெண்டிஸ் தெரிவித்தார்.
“இந்த விவகாரம் தற்போது நீதிமன்றத்திற்கு சென்றுள்ளதால் எங்களால் எதுவும் செய்ய முடியாது. வழக்கு முடியும் வரை நாங்கள் காத்திருக்க வேண்டும். மேலும், எந்த கதைக்கும் இரண்டு பக்கங்கள் உள்ளன,” என்று அவர் மேலும் கூறினார்.
ஏறக்குறைய ஒரு வருட காலமாக 15 வயதுடைய பாடசாலை மாணவியை அவ்வப்போது பாலியல் துஷ்பிரயோகத்திற்கு உட்படுத்தியதாக கூறப்படும் மாரவில தேவாலயம் ஒன்றின் பாதிரியாரை கைது செய்வதற்காக மாரவில பொலிஸ் சிறுவர் மற்றும் பெண்கள் பணியகம் விசாரணைகளை ஆரம்பித்துள்ளது.
