ஆக்கிரமிக்கப்பட்ட மேற்குக் கரை நகரமான நப்லஸில் இஸ்ரேலிய இராணுவம் நடத்திய தாக்குதலில் குறைந்தது 10 பாலஸ்தீனியர்கள் கொல்லப்பட்டுள்ளனர். ஏராளமானவர்கள் காயமடைந்துள்ளனர்.
புதன்கிழமை நடந்த இந்த கொடூர தாக்குதலிவ் குறைந்தது 102 பேர் காயமடைந்தனர் – 82 பேர் நேரடி வெடிமருந்துகளால் தாக்கப்பட்டனர் என்று பாலஸ்தீனிய சுகாதார அமைச்சகம் தெரிவித்துள்ளது. ஆறு பேர் ஆபத்தான நிலையில் இருந்தனர்.
காலை 10 மணிக்கு (08:00 GMT) இராணுவம் கவச வாகனங்கள் மற்றும் சிறப்புப் படைகளுடன் நப்லஸைத் தாக்கிய உடனேயே பரவலான மோதல்கள் வெடித்தன.
இரண்டு தேடப்பட்ட பாலஸ்தீனிய போராளிகளான ஹொசாம் இஸ்லீம் மற்றும் முகமது அப்துல்கானி ஆகியோர் தங்கியிருந்த ஒரு வீட்டைச் சுற்றி வளைப்பதற்கு முன்பு நகரத்தின் அனைத்து நுழைவாயில்களையும் இராணுவம் அடைத்தது.
லயன்ஸ் டென் ஆயுதக் குழு ஒரு அறிக்கையில், சமீபத்தில் அறிவிக்கப்பட்ட பாலாட்டா படைப்பிரிவுகளுடன் இணைந்து சோதனையின் போது இஸ்ரேலியப் படைகளுடன் மோதலில் ஈடுபட்டதாகக் கூறியது. இளம் பாலஸ்தீனியர்கள் கவச வாகனங்களை கற்களால் தாக்கினர்.
இஸ்ரேலிய இராணுவம் “பாதுகாப்புப் படைகள் இப்போது நப்லஸ் நகரில் செயல்படுகின்றன” என்று கூறியது ஆனால் கூடுதல் விவரங்களை வழங்கவில்லை.
நகருக்குள் நுழைந்த இஸ்ரேலிய வீரர்கள் கண்மூடித்தனமாக துப்பாக்கிச் சூடு நடத்தியதை நேரில் கண்ட பலர் ஊடகங்களிடம் விபரித்துள்ளனர்.
நப்லஸ் மற்றும் அருகிலுள்ள ஜெனின் ஆகியவை கடந்த ஆண்டில் இஸ்ரேலின் தீவிரமடைந்துள்ள வன்முறைகளின் மையமாக உள்ளன. மாண்டோவைஸ் என்ற செய்தித் தளத்தின் பாலஸ்தீனிய பத்திரிகையாளர் மரியம் பர்கௌதியின் கூற்றுப்படி, “ஆயுத எதிர்ப்பின் செறிவு வளர்ந்து வரும்” நகரங்களாக இவை மாறியுள்ளன.
“இது மேற்குக் கரையின் பிற பகுதிகளுக்கு விரிவடைந்து வருகின்ற போதிலும், லயன்ஸ் டென் மற்றும் ஜெனின் படைப்பிரிவு பாலஸ்தீனிய ஆயுத எதிர்ப்பு மற்றும் புதிய இளைஞர் குழுக்களின் சண்டையின் மையமாகத் தொடர்கிறது, அதனால்தான் அவர்கள் ஒரு இலக்காக மாறியுள்ளனர்” என்று பர்கௌதி கூறினார்.
பழைய நகரமான நாப்லஸில், தோட்டா துளைகள் நிறைந்த அருகிலுள்ள கடைகளுடன் கூடிய பெரிய வீடாக இருந்த இடிபாடுகளை மக்கள் வெறித்துப் பார்த்தனர். நிறுத்தப்பட்டிருந்த கார்கள் நசுக்கப்பட்டன. இடிந்த வீட்டில் இருந்து சிமெண்ட் மற்றும் மரச்சாமான்கள் மீது இரத்தக் கறை படிந்துள்ளது.
காசா பகுதியில், ஆளும் ஹமாஸ் கட்சியின் செய்தித் தொடர்பாளர் ஒரு மறைமுகமான அச்சுறுத்தலை வெளியிட்டார். “ஆக்கிரமிக்கப்பட்ட மேற்குக் கரையில் நமது மக்களுக்கு எதிராக எதிரியின் குற்றச்செயல்கள் அதிகரித்து வருவதை காசாவில் உள்ள எதிர்ப்பானது அவதானித்து வருகிறது, மேலும் அதன் பொறுமை தீர்ந்து வருகிறது” என்று அபு ஒபேடா கூறினார்.
பாலஸ்தீன அரசியல் கட்சிகள் புதன்கிழமையன்று ரமல்லா மற்றும் நப்லஸ் நகரங்களில் பொது வேலைநிறுத்தத்தை அறிவித்தன, பாலஸ்தீனியர்கள் இஸ்ரேலிய இராணுவ சோதனைச் சாவடிகளுக்கு அருகில் எதிர்ப்பு தெரிவிக்க வருமாறு அழைப்பு விடுத்தனர்.
2023 ஆம் ஆண்டு தொடக்கம் இஸ்ரேல் படைகளால் கொல்லப்பட்ட பாலஸ்தீனியர்களின் எண்ணிக்கை தற்போது ஆக்கிரமிக்கப்பட்ட பிரதேசங்களில் 13 குழந்தைகள் உட்பட 61 பேராக உயர்ந்துள்ளது.
பாலஸ்தீன ஜனாதிபதி மஹ்மூத் அப்பாஸின் செய்தித் தொடர்பாளர் நபில் அபு ருடைனே கூறுகையில், “நாப்லஸ் மீதான ஆக்கிரமிப்பு தாக்குதலை நாங்கள் கண்டிக்கிறோம், மேலும் எங்கள் மக்களுக்கு எதிரான தொடர்ச்சியான தாக்குதல்களை நிறுத்துமாறு கேட்டுக்கொள்கிறோம்.
இணையத்தில்வெளியிடப்பட்ட ஒரு வீடியோ இரண்டு இளைஞர்கள் ஒரு தெருவில் ஓடுவதைக் காட்டியது. துப்பாக்கிச் சூட்டுச் சத்தம் கேட்டதை தொடர்ந்து இருவரும் தரையில் விழுகின்றனர். இருவரது உடல்களும் அப்படியே இருந்தன.
