பாகிஸ்தானில் இன்று நடந்த அரசியல் பேரணியில் நடந்த துப்பாக்கிச்சூட்டில் முன்னாள் பிரதமர் இம்ரான் கான் மற்றும் பிற கட்சித் தலைவர்கள் உட்பட 7 பேர் காயமடைந்தனர். கட்சித் தொண்டர் ஒருவர் உயிரிழந்தார்.
பஞ்சாப் மாகாணத்தின் வஜிராபாத்தின் அல்லா வாலா சவுக்கை அடைந்தபோது, துப்பாக்கிச்சூடு நடத்தப்பட்டது.
இறந்தவர் முவாசம் நவாஸ் என அடையாளம் காணப்பட்டுள்ளதாக பஞ்சாப் போலீசார் தெரிவித்தனர்.
“இது ஒரு தெளிவான படுகொலை முயற்சி. கான் தாக்கப்பட்டார் ஆனால் அவர் நிலையாக இருக்கிறார். நிறைய இரத்தப்போக்கு இருந்தது. துப்பாக்கிச்சூடு நடத்தியவரை அங்குள்ள மக்கள் தடுத்து நிறுத்தாமல் இருந்திருந்தால், ஒட்டுமொத்த பாகிஸ்தான் தெஹ்ரீக்-இ-இன்சாப் (பி.டி.ஐ) தலைமையும் அழிக்கப்பட்டிருக்கும்“ என கட்சி வட்டாரங்கள் தெரிவித்தன.
அந்த இடத்தில் இருந்து சந்தேக நபர் ஒருவரும் கைது செய்யப்பட்டார்.
துப்பாக்கிச் சூட்டைத் தொடர்ந்து, இம்ரான் கான் உடனடியாக லாகூரில் உள்ள மருத்துவமனைக்கு மாற்றப்பட்டார். மற்ற காயமடைந்தவர்கள் ஆம்புலன்ஸ்கள் மூலம் அருகிலுள்ள வஜிராபாத் இருதயவியல் நிறுவனத்திற்கு அழைத்துச் செல்லப்பட்டனர்.
துப்பாக்கி சூடு காரணமாக பிடிஐயினர் உட்பட 7 பேர் காயமடைந்தனர். காயமடைந்தவர்களில் ஒரு குழந்தையும் அடங்குவதாகவும் தகவல்கள் தெரிவிக்கின்றன.
காயமடைந்த இம்ரான் கான் துப்பாக்கியால் சுடப்பட்டதாகவும், பின்னர் அவரது குண்டு துளைக்காத டிரக்கிற்கு கொண்டு செல்லப்பட்டதாகவும் கூறப்பட்ட பின்னர் ஆதரவாளர்களை நோக்கி கை அசைப்பதை தொலைக்காட்சியில் காணொளிகள் காட்டியது.
தொலைக்காட்சியில் ஒளிபரப்பப்பட்ட காட்சிகளில், தாக்குதல் நடத்தப்பட்டவர் கட்சி ஆதரவாளர்களால் மடக்கிப் பிடிக்கப்பட்டதை காண முடிந்தது. பின்னர் அவர் பொலிசாரால் அழைத்துச் செல்லப்பட்டார்..
பிடிஐ தலைவர் அசாத் உமர், சம்பவம் நடந்த சில மணிநேரங்களுக்குப் பிறகு வீடியோ செய்தியில், கட்சியின் தலைவர் இம்ரான் கான் இன்றைய தாக்குதலுக்குப் பின்னால் இருக்கக்கூடிய மூன்று சந்தேக நபர்களைக் குறிப்பிட்டுள்ளார் என்றார்.
“இந்த வீடியோவுக்கு சற்று முன்பு, இம்ரான் கான் எங்களை அழைத்து, இந்த செய்தியை தனது சார்பாக நாட்டுக்கு தெரிவிக்கும்படி கூறினார். இதற்கு முன்னரும் சில தகவல்கள் கிடைத்துள்ளன“ என அவர் தெரிவித்துள்ளார்.
“தாக்குதலில் மூன்று பேர் ஈடுபட்டுள்ளதாக அவர் நம்புகிறார். அந்த மூன்று பேர், பிரதமர் ஷெபாஸ் ஷெரீப், உள்துறை அமைச்சர் ராணா சனாவுல்லா மற்றும் பாகிஸ்தான் இராணுவ அதிகாரி மேஜர் ஜெனரல் பைசல்” என்று உமர் கூறினார்.
இந்த தாக்குதலுக்கு அரசியல் பிரிவினரிடையே பரவலான கண்டனங்கள் எழுந்தன.
