கல்கிஸ்ஸை, ஹுலுடகொட பகுதியில் உள்ள வெற்றுக்காணியொன்றில் கூர்மையான ஆயுதங்களால் தாக்கப்பட்டு எரிக்கப்பட்ட நிலையில் இளைஞன் ஒருவரின் சடலம் கண்டெடுக்கப்பட்டுள்ளதாக கல்கிஸ்ஸை தலைமையக பொலிஸார் தெரிவித்தனர்.
இந்தக் கொலை தொடர்பாக வெளிநாட்டில் தலைமறைவாக உள்ள சந்தேகத்திற்குரிய போதைப்பொருள் கடத்தல்காரர் ஒருவரின்இரண்டு கூட்டாளிகள் விசாரணைக்காக கைது செய்யப்பட்டுள்ளனர். மேலும் ஒரு முச்சக்கர வண்டியும் காவல்துறையினரால் கைப்பற்றப்பட்டுள்ளது.
இந்தக் கொலையில் பலியானவர் ரத்மலானை மஹிந்தராம வீதியில் வசித்து வந்த திகிர என்ற 23 வயது கவிந்த கயாஷன் ரணவக்க ஆவார். இறந்தவரின் தாயார், தனது மகனைக் காணவில்லை என்று கடந்த 29 ஆம் திகதி இரவு கல்கிசை காவல் தலைமையகத்தில் புகார் அளித்திருந்தார்.
இதற்கிடையில், கொலை செய்யப்பட்ட பின்னர் ‘மொரட்டுவ பாதாள உலகம்’ என்ற சமூக ஊடக தளத்தில் சடலத்தின் புகைப்படம் பதிவேற்றப்பட்டிருந்தது. அதன் மூலம் போலீசார் விசாரணைகளை மேற்கொண்டு வந்த நிலையில், சடலம் கண்டுபிடிக்கப்பட்டது.
இந்த நபர் ஒரு குறிப்பிட்ட பகுதியிலிருந்து முச்சக்கர வண்டியில் கடத்தப்பட்டு, இந்த இடத்திற்கு கொண்டு வரப்பட்டு, கூர்மையான ஆயுதங்களால் குத்தியும், அடித்தும் கொலை செய்யப்பட்டு, பின்னர் அவரது முகம் உட்பட உடலின் பல பாகங்களை எரித்திருக்கலாம் என்று போலீசார் சந்தேகிக்கின்றனர்.
போதைப்பொருள் கடத்தலில் ஈடுபட்டதாகக் கூறப்படும் இந்த நபர், பல சந்தர்ப்பங்களில் காவல்துறையினரால் கைது செய்யப்பட்டுள்ளதாகவும், போதைப்பொருளுக்கு மிகவும் அடிமையானவர் என்றும் காவல்துறை கூறுகிறது.
பெரிய அளவிலான போதைப்பொருள் கடத்தல்காரர் ஒருவரன் நெருங்கிய கூட்டாளியாக இருந்த அந்த இளைஞன், போதைப்பொருள் கடத்தல் தொழிலில் ஈடுபட்டவர்களை காட்டிக் கொடுத்து கொலைக்கு காரணமாக இருக்கலாம் என்றும் போலீசார் கூறுகின்றனர்.
கைது செய்யப்பட்ட இரண்டு சந்தேக நபர்களிடமிருந்து இந்தக் கொலை தொடர்பான பல முக்கிய தகவல்கள் தெரியவரும் என்று மூத்த காவல்துறை அதிகாரி ஒருவர் தெரிவித்தார்.
