ஜனாதிபதி செயலகத்திற்கு சொந்தமான நூற்றுக்கணக்கான சொகுசு அரச வாகனங்கள் உரிய முறையில் கையளிக்கப்படாமல் கைவிடப்பட்டமை தொடர்பில் முறையான விசாரணை நடத்தப்படும் என தேசிய மக்கள் சக்தியின் தேசிய செயற்குழு உறுப்பினர் வசந்த சமரசிங்க தெரிவித்துள்ளார்.
முன்னாள் இராஜாங்க அமைச்சர்கள், பிரதி அமைச்சர்கள் மற்றும் அமைச்சுக்களின் செயலாளர்கள் பயன்படுத்திய பல ஜீப் வண்டிகள் நேற்று காலி முகத்திடல் பாலதக்ஷ மாவத்தையில் அமைந்துள்ள வாகன தரிப்பிடத்திற்கு கொண்டு வரப்பட்டன.
புதிய ஜனாதிபதியின் நியமனத்துடன் அமைச்சுக்களில் மேற்கொள்ளப்பட்ட பல மாற்றங்கள் காரணமாக அமைச்சுக்களில் பயன்படுத்தப்படும் இந்த வாகனங்கள் பலதக்ஷ மாவத்தைக்கு அருகிலுள்ள வாகன தரிப்பிடத்திற்கு கொண்டு வரப்பட்டிருந்தன. நேற்றைய நிலவரப்படி ஏராளமான வாகனங்களும் அந்த இடத்திற்கு கொண்டு வரப்பட்டதையும் காண முடிந்தது.
ஜனாதிபதி செயலக வளாகத்தில் நேற்று ஊடகங்களுக்கு கருத்து தெரிவித்த வசந்த சமரசிங்க மேலும் தெரிவிக்கையில், ஜனாதிபதி செயலகத்திற்கு சொந்தமான 833 வாகனங்கள் குறித்த தகவல்கள் இந்த ஆவணங்களில் உள்ளதாக குறிப்பிட்டார். அந்த 833 வாகனங்களில் 29 வாகனங்கள் 2022ஆம் ஆண்டுக்குள் காணாமல் போய்விட்டன.
இந்த நாட்டின் முன்னாள் ஜனாதிபதிகளான ரணில் விக்கிரமசிங்க, மைத்திரிபால சிறிசேன, கோட்டாபய ராஜபக்ச, மஹிந்த ராஜபக்ஷ, சந்திரிகா குமாரதுங்க ஆகியோர் இந்த வாகனங்களை விழுங்கினார்களா என்று கேட்கின்றோம். அவர்கள் பதவிக்காலத்தில் பயன்படுத்திய பொதுச் சொத்தை அவர்கள் வெளியேறும்போது கையளிக்க வேண்டிய பொறுப்பு அவர்களுக்கு இருந்தது. ஜனாதிபதி அனுரகுமார திஸாநாயக்க பதவியேற்று இரண்டு நாட்கள் நிறைவடைந்துள்ளன. இந்த தகவலை இரண்டு நாட்களில் எங்களால் வெளியிட முடிந்தது. ஜனாதிபதி செயலகத்திற்கு சொந்தமான சுமார் 253 வாகனங்கள் வெளி நிறுவனங்களுக்கு வழங்கப்பட்டு இயக்கப்பட்டுள்ளன. இப்போது அவையே பல இடங்களில் கைவிடப்பட்டவை. இங்கு மட்டுமின்றி அறக்கட்டளை நிறுவனத்திலும் பல வாகனங்கள் நிறுத்தப்பட்டுள்ளன.
இந்த நாட்டில் மோசடி, ஊழல் ஒழியும் என்பதற்கு இதுவே நல்ல சான்று. இந்த வாகனங்கள் பொறுப்பற்ற முறையில் கொண்டு வரப்பட்டு கைவிடப்பட்டுள்ளன. இந்த வாகனங்களை கைவிட்டு சென்றவர்களின் விபரங்களை தற்போது கோரியுள்ளோம். மத்திய வங்கியின் பிணைமுறி மோசடி, ஈஸ்டர் ஞாயிறு தாக்குதலுக்கு காரணமானவர்கள், பார் உரிமம் வைத்திருப்பவர்களின் பட்டியல் தற்போது எமக்கு கிடைத்துள்ளது. இந்த சம்பவங்கள் தொடர்பாக முறையான விசாரணைகள் நடத்தப்படும். இந்த இடங்களில் நிறுத்தப்பட்டிருந்த வாகனங்களையும் ஐரோப்பிய யூனியன் தேர்தல் பார்வையாளர்கள் கண்காணித்தனர்.
கடந்த அரசாங்கத்தின் கீழ், இராஜாங்க அமைச்சர்களின் பாவனை மற்றும் பாதுகாப்பிற்காக மூன்று உத்தியோகபூர்வ வாகனங்கள், இராஜாங்க அமைச்சரின் பிரத்தியேக செயலாளரின் பாவனைக்கு ஒரு வாகனம் மற்றும் ஏனைய உதவி ஊழியர்களுக்கு இரண்டு வாகனங்கள் உட்பட ஆறு வாகனங்கள்ஒரு இராஜாங்க அமைச்சரினால் பயன்படுத்தப்பட்டன.
இராஜாங்க அமைச்சரின் மூன்று உத்தியோகபூர்வ வாகனங்களும் ஒரு பெற்றோல் வாகனம் ஒன்றுக்கு 500 லீற்றர்கள் மற்றும் டீசல் வாகனம் ஒன்றிற்கு 500 லீற்றர்கள் உட்பட மாதாந்தம் 1,500 லீற்றர் எரிபொருளைப் பெறுவதற்கு உரிமையுள்ளது.
“மக்கள் வாழ்வதற்குக் கூட கடினமாக இருந்த நேரத்தில் 37 இராஜாங்க அமைச்சர்களை நியமித்து அவர்களுக்கான வாகனங்களை ஒதுக்கியதன் மூலம் நாட்டின் செலவுகள் மேலும் அதிகரித்துள்ளதாக மக்கள் கருதுகின்றனர்,” என்று அவர் கூறினார்.
