13 வயதான பாடசாலை மாணவி ஒருவர் சுமார் இரண்டு வருடங்களாக கூட்டு வன்புணர்வுக்கு உட்படுத்தப்பட்ட சம்பவம் தொடர்பில் தனியார் பஸ் நடத்துனர் உட்பட ஐவர் கைது செய்யப்பட்டுள்ளதாக களுத்துறை வடக்கு பொலிஸார் தெரிவித்தனர்.
இவ்வாறு களுத்துறை, தியகம பிரதேசத்தில் வசிக்கும் மூவரும், அவர்கள் சிறுமியுடன் வீட்டில் தங்குவதற்கு உதவிய ஒருவருமே கைது செய்யப்பட்டுள்ளனர். ஹொரணை ரெமுன பிரதேசத்தில் வசிக்கும் தனியார் பஸ் நடத்துனரும் கைது செய்யப்பட்டுள்ளார்.
கைது செய்யப்பட்டவர்களில் இருவர் திருமணமானவர்கள் எனவும் அவர்களில் ஒருவர் 60 வயதுக்கு மேற்பட்ட சிறுமியின் தாத்தா எனவும் பொலிஸார் தெரிவித்தனர்.
13 வயது சிறுமி நோய்வாய்ப்பட்ட பெற்றோர் மற்றும் மூத்த சகோதரனுடன் வசித்து வந்துள்ளார். சிறுமியின் வீட்டின் வறுமையை பயன்படுத்தி பணம் மற்றும் பிற பொருட்களை கொடுத்து, சிறுமியை சுமார் இரண்டு வருடங்களாக கூட்டு பலாத்காரம் செய்து வந்துள்ளதாக பொலிசார் தெரிவித்துள்ளனர்.
சுமார் ஒரு மாதத்திற்கு முன்னர், ஹொரண ஆதார வைத்தியசாலையில் சிகிச்சை பெற்றுவரும் தனது அத்தையை பார்க்கச் சென்ற போது, தனியார் பஸ் நடத்துனர் சிறுமியை ரெமுனாவில் உள்ள அவரது வீட்டிற்கு அழைத்துச் சென்று பாலியல் பலாத்காரம் செய்துள்ளார். பின்னர் மீண்டும் பஸ் நிலையத்தில் விட்டுள்ளார். இதன் போது சிறுமி வேறு நபர்களுக்கு பலியாகியுள்ளதாகவும் தகவல் கிடைத்துள்ளது.
இந்த சம்பவம் தொடர்பாக மேலும் இருவரை கைது செய்ய விசாரணை நடத்தி வருவதாக போலீசார் தெரிவித்தனர்.
களுத்துறை வடக்கு பொலிஸ் நிலைய பிரதான பொலிஸ் பரிசோதகர் தமித் ஜயதிலகவிற்கு கிடைத்த தகவலின் அடிப்படையில் மேற்கொள்ளப்பட்ட விசாரணையின் பின்னர் சிறுமியிடம் இருந்து பெறப்பட்ட வாக்குமூலத்தின் அடிப்படையில் ஏனைய சந்தேக நபர்கள் கைது செய்யப்பட்டுள்ளனர்.
சிறுமி தற்போது களுத்துறை நாகொட போதனா வைத்தியசாலையில் அனுமதிக்கப்பட்டுள்ளதுடன், சந்தேகநபர்கள் களுத்துறை நீதவான் நீதிமன்றில் ஆஜர்படுத்தப்படவுள்ளனர்..
