பெண்ணொருவரை கடத்திச் சென்று வீடொன்றில் அடைத்து வைத்து கப்பம் பெற முயன்ற மேலும் இரு பெண்களை மாரவில பொலிஸார் கைது செய்துள்ளனர்.
கொச்சிக்கடை, தலுகொடுவ பிரதேசத்தை சேர்ந்த இருவரே இவ்வாறு கைது செய்யப்பட்டுள்ளதாக தெரிவிக்கப்படுகின்றது.
நேற்று (24) கட்டுனேரிய பிரதேசத்தைச் சேர்ந்த ஒருவர் தனது மனைவியை சிலர் கடத்திச் சென்று கொச்சிக்கடை பகுதியில் உள்ள வீடொன்றில் வைத்து கப்பம் கோரியதாக மாரவில பொலிஸில் முறைப்பாடு செய்துள்ளார்.
அந்த முறைப்பாட்டின் பேரில், கொச்சிக்கடை பகுதியில் உள்ள வீடொன்றில் அடைக்கப்பட்டிருந்த பெண்ணை விடுவிக்க பொலிஸார் நடவடிக்கை எடுத்துள்ளனர்.
அங்கு, பெண்ணைக் கடத்திச் சென்று காவலில் வைத்திருந்த இரண்டு பெண்களும் கைது செய்யப்பட்டனர்.
மேலும் தொடர்புடைய நான்கு பேரை கைது செய்வதற்கான விசாரணைகள் ஆரம்பிக்கப்பட்டுள்ளதாக பொலிஸார் தெரிவித்தனர்.
கடத்தப்பட்ட பெண் மன உளைச்சலுக்கு உள்ளாகியுள்ளதால் மாரவில அடிப்படை வைத்தியசாலையில் சிகிச்சைக்காக அனுமதிக்கப்பட்டுள்ளதாக தெரிவிக்கப்படுகின்றது.
பெண்ணை கடத்தியதற்கான காரணம் இதுவரை வெளியாகவில்லை.
