பாகிஸ்தானின் சியால்கோட்டில் மதநிந்தனை குற்றச்சாட்டில் அடிப்படைவாத கும்பலால் இலங்கையர் ஒருவர் அடித்துக் கொல்லப்பட்ட சம்பவம் தொடர்பான மற்றொரு புதிய காணொளி வெளியாகியுள்ளது.
இதில், தொழிற்சாலையின் மற்றொரு ஊழியர் ஒருவர், தனது மேலாளரை காப்பாற்ற பகீத பிரதயத்தனப்படும் காட்சிகள் அடங்கியுள்ளன.
வஜிராபாத் சாலையில் அமைந்துள்ள ராஜ்கோ இண்டஸ்ட்ரீஸ் ஆடைத் தொழிற்சாலை மேலாளரான பிரியந்த குமார என்பவரே அடித்துக் கொல்லப்பட்டார்.
பஞ்சாப் ஐஜிபி ராவ் சர்தார் அலி கான், சர்வதேச ஊடகங்களிற்கு வெளியிட்ட தகவலின் படி, பொலிசாரின் ஆரம்ப அறிக்கையில், வெளிநாட்டு பிரதிநிதிகள் வருவதற்கு முன்பு தொழிற்சாலை இயந்திரங்களில் உள்ள அனைத்து ஸ்டிக்கர்களையும் அகற்றுமாறு ஊழியர்களிடம் பிரியந்த கூறியுள்ளார்.
இஸ்லாம் மத அடையாளங்களை கொண்ட அந்த சுவரொட்டிகளை அகற்றுவது மத நிந்தனையென கூறிய குழுவினர், தொழிற்சாலை வளாகத்தில் தொழிலாளர்கள் போராட்டத்தில் ஈடுபட்டனர். அவர்கள் போக்குவரத்தை தடுத்து நிறுத்தினர். படிப்படியாக இந்த போராட்டத்தில் அனைத்து தொழிற்சாலை ஊழியர்களும் மற்றும் ஏராளமான உள்ளூர் மக்களும் இணைந்தனர்.
அவர்கள் பிரியந்தவை வெளியில் வருமாறு கூச்சலிட்டனர்.
அடிப்படைவாதிகளின் போராட்டத்தில் நூற்றுக்கணக்கானவர்கள் கூடுவதை அவதானித்த பிரியந்த அச்சமடைந்து, கூரைக்கு ஓடினார்.
அவரை விரட்டிச் சென்ற கும்பல் கூரையில் ஏறி, அவரை கடுமையாக தாக்கிய போது, , தொழிற்சாலை ஊழியர் ஒருவர், பிரியந்தவை காப்பாற்ற பகீரத பிரயத்தனப்படும் காணொளி வெளியாகியுள்ளது.
தனது கால்களிற்கிடையில் பிரியந்தவை வைத்துக் கொண்டு, தாக்குதல்தாரிகளிடமிருந்து காப்பாற்ற முயற்சிக்கிறார்.
வீடியோவை காண இங்கு அழுத்துங்கள்
எனினும், அவரது முயற்சி வெற்றி பெறவில்லை. அவரை அடித்து இழுத்து வந்து வீதியில் வைத்து கொடூரமாக தாக்கிய போது பிரியந்த உயிரிழந்தார். பின்னர் அந்த கும்பல் உடலை தீ வைத்து எரித்தது.
பிரியந்த என்ற இலங்கை கிறிஸ்தவர் 10 வருடங்களாக ராஜ்கோ இண்டஸ்ட்ரீஸில் பணியாற்றி வந்தார்.
வெள்ளிக்கிழமை பிற்பகுதியில், சியால்கோட் டிசி மற்றும் டிபிஓ மாகாண அதிகாரிகளின் கூட்டத்திற்கு வீடியோ இணைப்பு மூலம் சம்பவம் பற்றிய விவரங்கள் குறித்து விளக்கினர். இறந்தவர் ஒரு கண்டிப்பான நிர்வாகி என்று அறியப்பட்டதாக அவர்கள் கூறினர்.
கைது செய்யப்பட்டவர்களில் இரண்டு முக்கிய சந்தேக நபர்களான ஃபர்ஹான் இத்ரீஸ் மற்றும் உஸ்மான் ரஷீத் ஆகியோர் அடங்குவர் என்று இரவு நேர அறிக்கையில் ஐஜிபி கூறினார்.
சனிக்கிழமையன்று, தகவல் தொடர்பான பஞ்சாப் முதலமைச்சரின் சிறப்பு உதவியாளர் ஹசன் கவார் கைது செய்யப்பட்டவர்களின் எண்ணிக்கை 118 என்றும், 200 சோதனைகள் நடத்தப்பட்டதாகவும், தடுத்து வைக்கப்பட்டவர்களில் 13 முதன்மை சந்தேக நபர்கள் இருப்பதாகவும் கூறினார்.
பஞ்சாப் ஐஜிபி ராவ் சர்தார் அலி கானுடன் இணைந்து லாகூரில் செய்தியாளர் கூட்டத்தில், சிறப்பு உதவியாளர் 160 சிசிடிவி கேமராக்களில் இருந்து காட்சிகளைப் பெற்றுள்ளதாகவும், மொபைல் டேட்டா மற்றும் அழைப்பு பதிவுகள் போன்ற கூடுதல் வீடியோ மற்றும் தரவு ஆதாரங்களும் பகுப்பாய்வு செய்யப்படுவதாகவும் கூறினார்.
“கணிசமான முன்னேற்றம் ஏற்பட்டுள்ளது, விசாரணை தொடர்கிறது” என்று கூறிய கவார், உள்துறை மற்றும் வெளியுறவு அமைச்சகங்கள் மூலம் உடல் இலங்கை தூதரகத்திடம் ஒப்படைக்கப்படும் என்று கூறினார்.
“நீதி நிறைவேற்றப்படும் என்று நான் உங்களுக்கு மீண்டும் உறுதியளிக்க விரும்புகிறேன்,” என்று அவர் கூறினார், மேலும் யாருக்கும் எந்த வழிவகையும் வழங்கப்படாது, அதிகாரிகள் தங்கள் கடமைகளில் அலட்சியம் செய்தது கண்டறியப்பட்டாலும் நடவடிக்கை எடுக்கப்படும்.
இதுவரை கிடைத்த தகவல்களின்படி, வெள்ளிக்கிழமை காலை 10:02 மணிக்கு இந்த சம்பவம் தொடங்கி, காலை 10:45 மணியளவில் வன்முறை மற்றும் அடிதடியாக மாறி, காலை 11:05 மணிக்கு பிரியந்தவின் மரணத்திற்கு வழிவகுத்தது என்று ஐஜிபி வெள்ளிக்கிழமை நிகழ்வுகளின் காலவரிசையை வழங்கினார்.
சம்பவம் குறித்து காலை 11:28 மணிக்கு போலீசாருக்கு தகவல் வழங்கப்பட்டதாகவும், 11:45 மணிக்கு சம்பவ இடத்திற்கு வந்ததாகவும் அவர் கூறினார்.
குற்றவாளிகளை சட்டத்தின் முன் நிறுத்த பயங்கரவாத எதிர்ப்பு நீதிமன்றத்தில் கூடிய விரைவில் அறிக்கை சமர்ப்பிக்கப்படும் என்று ஐஜிபி ராவ் கூறினார்.
